Խաղաքարերի ռազմավարություն ասելով` նկատի ունենք խաղաքարերն ավելի լավը դարձնելու գործընթացը: Ավելի լավ խաղաքարերը կարողանում են լավ քայլեր կատարել, իսկ լավ քայլերն իրենց հերթին տանում են դեպի ավելի լավ խաղի: Իսկ ի՞նչ է նշանակում լավ խաղաքար: Լավ խաղաքարը այն խաղաքարն է, որը խաղատախտակի վրա լավ դիրք է ձեռք բերել, կամ այն խաղաքարը, որը կարողանում է լավագույնս համագործակցել մյուս խաղաքարերի հետ: Լավ խաղաքարը սովորաբար ակտիվ է լինում, հարձակվում է, կամ այլ օգտակար գործառույթ է իրականացնում: Վատ խաղաքարը պասիվ խաղաքար է, որը պաշտպանողական գործառույթ է իրականացնում, կամ ոչ մի օգտակար քայլ չի անում: Պետք է միշտ ձգտեք բարելավել ձեր խաղաքարերը, և թուլացնել հակառակորդի խաղաքարերը:
Շախմատում քայլերից շատերը դիրքային քայլեր են և ոչ մարտավարական քայլեր: Մարտավարական քայլերը սպառնալիքներ են ստեղծում և օգնում նյութական ձեռքբերում ունենալ կամ մատ հայտարարել հակառակորդին: Դիրքային քայլերի շնորհիվ դուք բարելավում եք ձեր խաղաքարերը, որոնք հետագայում մարտավարական քայլերի հերոսներ են դառնում: Սկզբնախաղում ձեր գրեթե բոլոր քայլերը դիրքային քայլեր են, որոնք խաղաքարերի դիրքերը բարելավելու նպատակ են հետապնդում: Երբ զարգացնում եք ձեր խաղաքարերը, դուք դրանք տեղափոխում եք ավելի լավ դաշտեր, ակտիվացնում եք, որպեսզի կարողանաք հարձակվել հակառակորդի վրա: Ողջ խաղի ընթացքում դուք պետք է դիրքային քայլեր անեք` բարելավելու ձեր խաղաքարերը: Լավ խաղաքարերը տանում են լավ քայլերի, լավ քայլերն էլ իրենց հերթին տանում են լավ խաղի և լավ արդյունքի:
Խաղաքարերի ռազմավարությունը բաղկացած է երեք մասից, որն ուղղված է խաղաքարերի բարելավմանը: Այդ մասերից յուրաքանչյուրը վերաբերում է խաղաքարերի տարբեր խմբերի:
Ցանկացած քայլ անելուց առաջ անհրաժեշտ է հաշվի առնել, թե ինչ տեղի կունենա զինվորային կառույցի հետ այդ քայլից հետո: Փորձե՛ք ուժեղացնել ձեր զինվորները և թուլացնել հակառակորդի զինվորները, և եթե արդեն ունեք ուժեղ զինվորներ, ձգտե՛ք պահել դրանք: Իսկ եթե ձեր զինվորները թույլ են, ձգտեք ուժեղացնել դրանց: Եթե հակառակորդն ունի ուժեղ զինվորներ, փորձե՛ք գրավել դրանց, իսկ եթե նրա զինվորները թույլ են, օգնեք նրանց պահել այդ իրավիճակը, քանի որ տրամաբանական չէ զոհաբերել ձեր ուժեղ զինվորին հանուն հակառակորդի թույլ զինվորի: Թույլ զինվորները ձեզ միայն անհանգստություն կպատճառեն խաղում, մինչդեռ ուժեղ զինվորերը միշտ էլ օգնության կհասնեն, հատկապես վերջնախաղում:
1. Պաշտպանե՛ք ձեր խաղաքարերը: Անպաշտպան խաղաքարերը միշտ էլ անհանգստության պատճառ են և կարող են լուրջ խնդիրների հանգեցնել: Դրանք դառնում են հակառակորդի մարտավարական հնարքների և հարձակումների թիրախները: Դրանք կարող են նաև խոչընդոտել ձեր սեփական պլաններին: Մեկ անպաշտպան խաղաքարը կարող է օգնել ձեր հակառակորդին ամբողջությամբ ջախջախել ձեր մարտավարական պլանները: Վաղ թե ուշ անպաշտպան խաղաքարերը ձեզ խնդրի առջև կկանգնեցնեն: Նույնիսկ եթե ձեր խաղաքարերը հարձակման տակ չեն, միևնույն է` անհրաժեշտ է պաշտպանել դրանք, որպեսզի հետագայում չանհանգստանաք դրանց համար:
2. Բարելավե՛ք ձեր խաղաքարերը: Անհրաժեշտ է ամեն հնարավոր պահի բարելավել ձեր խաղաքարերը, ինչը նշանակում է, որ պետք է խաղաքարերն ավելի լավ դաշտերի վրա տեղակայել, որտեղից կկարողանան ավելի արդյունավետ գործել: Լավ դաշտերը սովորաբար կենտրոնական դաշտերն են, կամ հակառակորդի տարածքում են, կամ հակառակորդի արքային մոտ: Պետք է կարողանաք նաև այնպես անել, որ ձեր խաղաքարերը կարողանան համագործակցել միմյանց հետ: Այն խաղաքարերը, որոնք կարողանում են համագործակցել միմյանց հետ, ավելի լավ հարձակումներ են իրագործում և կարողանում են հարկ եղած դեպքում պաշտպանվել: Մի՛շտ ձգտեք բարելավել ձեր խաղաքարերը:
3. Ակտիվացրե՛ք ձեր խաղաքարերը։ Ակտիվ խաղաքարերը այն խաղաքարերն են, որ հարձակում են գործում և ինչ-որ օգտակար գործառույթ իրականացնում: Պասիվ խաղաքարերը այն խաղաքարերն են, որ պաշտպանական գործառույթ են իրականացնում, կամ, վատագույն դեպքում, ոչ մի օգտակար քայլ չեն անում: Ձգտե՛ք ակտիվացնել ձեր խաղաքարերը և պասիվացնել հակառակորդի խաղաքարերը: Դուք չեք ցանկանա կորցնել ձեր ակտիվ խաղաքարը հանուն հակառակորդի պասիվ խաղաքարի, նույնիսկ եթե այդ խաղաքարերն ունեն միևնույն արժեքը: Ակտիվ խաղաքարերն ավելին արժեն, քան պասիվ խաղաքարերը:
Սկզբնախաղում արքային պաշտպանելու լավագույն ձևը փոխատեղումն է: Միջնախաղում և վերջնախաղում արքայի մոտ պահե՛ք մի քանի զինվոր և խաղաքար: Եթե ձեր հակառակորդը նյութապես գերազանցում է ձեզ, կամ ավելի լավ վերահսկողություն ունի արքայի շուրջը, պետք է ուշադիր լինել, քանի որ նա կարող է հարձակում ձեռնարկել ձեր դեմ: Եթե նրան հաջողվի հեռացնել ձեր արքայի պաշտպան հանդիսացող խաղաքարերը, նա կարող է ձեզ մատ հայտարարել: Մի՛շտ ուշադրության կենտրոնում պահեք արքային շարջապատող տարածքը: Ձգտե՛ք արքայի ապահովությանը:
Այս ամենի հետ մեկտեղ պետք է փորձեք անապահով միջավայր ստեղծել հակառակորդի արքայի համար: Եթե ձեզ հաջողվի ջախջախել հակառակորդի արքային պաշտպանող զինվորներին, կամ ստիպել խաղաքարերին լքել արքային, կամ գրավել դրանց, դուք կկարողանաք հարձակում իրագործել: Կամ, միգուցե, ձեզ հաջողվի գրավել հակառակորդի արքային շրջապատող տարածքը ձեր զինվորներով և խաղաքարերով: Այս դեպքում կկարողանաք մատային հարձակում իրագործել և հաջողության հասնել: