Շախմատային 10 վատ սովորություն, որոնցից պետք է ազատվել - ChessSchool

Շախմատային 10 վատ սովորություն, որոնցից պետք է ազատվել

Շախմատային 10 վատ սովորություն, որոնցից պետք է ազատվել

Սովորությունը անպայման վարքագիծ է, որ պարբերաբար կրկնվում է: Լավ սովորությունը կարող է օգնել խաղում, սակայն վատը կարող է հեշտությամբ փչացնել այն: Հետևաբար, շատ կարևոր է ուշադրությամբ ուսումնասիրել դրանք և ինչքան հնարավոր է շուտ ազատվել վատ սովորություններից: Այսօր կխոսենք այն 10 հիմնական վատ սովորության մասին, որոնցից յուրաքանչյուր շախմատիստ պետք է փորձի ազատվել:


 

1. Մի՛ համեմատեք ինքներդ ձեզ ուրիշների հետ

Բոլոր շախմատիստներն էլ տարբեր են: Այն սկզբնախաղերը, որ ոմանց հաջություն է բերում, պարտադիր չէ, որ հաջողակ լինի մյուսների համար: Նույնը վերաբերում է նաև մարզումներին: Որոշ շախմատիստների մոտ առաջընթացն ավելի արագ է տեղի ունենում, քան մյուսների մոտ: Որոշների համար բավականին երկար ժամանակ է պահանջվում բաղձալի արդյունքին հասնելու համար: Եվ, իհարկե, այս ամենը լիովին նորմալ է: Այս հասկացությունը նման է քաշային մարզումներին: Որոշ մարզիկների հաջողվում է ավելի արագ մկաններ զարգացնել, քան մյուսներին: Սակայն, սա չի նշանակում, որ եթե դուք այդ «արդյունքին ուշ հասղնողների» շարքում եք, հաջողության չեք հասնի: Ամենևին: Դուք պետք է պարզապես ավելի շատ մարզվեք և եթե շարունակեք աշխատել, հավատացե՛ք, կարող եք հասնել բաղձալի արդյունքին: Սա է պատճառը, որ ձեզ ուրիշների հետ համեմատելն այնքան էլ լավ միտք չէ: Կարևորն այն է, թե որ մակարդակի վրա էիք 6 տարի առաջ և որտեղ եք կանգնած հիմա: Եթե դուք նկատում եք առաջխաղացում, դրական արդյունքներ, ապա ճիշտ ուղու վրա եք: Իսկ եթե ոչ, անհրաժեշտ է փոփոխությունների գնալ:

2. Մի՛ վախեցեք ռիսկի դիմելուց

Շատերն են վախենում ռիսկի դիմելուց: Դրա պատճառն, իհարկե, հնարավոր պարտություններն են: Նրանք չեն հասկանում, որ միշտ ապահով ու անվտանգ խաղ խաղալով, առանց սթրեսի և մարտահրավերների, անհնար է բարելավել շախմատի մակարդակը: Զոհաբերությունների գնալով և պայքարելով խաղատախտակի վրա` դուք առաջ կտանեք ձեր կարողությունները, ինչն էլ ձեզ ավելի լավ շամատիստ կդարձնի:

3. Մի՛ կենտրոնացեք ձեր նախկին խաղերի վրա

Շատ շախմատիստներ կենտրոնանում են իրենց նախկին հաղթանակների և պարտությունների վրա` հետագա խաղերի վրա կենտրոնանալու փոխարեն: Դա ձեզ այնքան էլ չի օգնի: Լավագույն մոտեցումն է մոռանալ նախկինում ձեր հաջողություններն ու անհաջողությունները և յուրաքանչյուր նոր խաղին վերաբերվել որպես նոր սկզբի: Մի՛ մեղադրեք ինքներդ ձեզ մի քանի խաղ առաջ թույլ տված սխալների համար և շատ մի ոգևորվեք, որ կարողացաք գտնել ճիշտ որոշումը նախորդ խաղում: Այդ խաղերը այժմ կարևոր չեն և ոչնչով ձեզ չեն օգնի հաղթելու այս խաղը: Կենտրոնացե՛ք ամենակարևորի վրա:

4. Մի՛ կրկնեք ձեր` նախկինում արված սխալները

Գիտե՞ք, թե ինչու շատ շախմատիստներ 20-30 տարի են հատկացնում շախմատ խաղալու վրա, սակայն այդպես էլ չեն հասնում բաղձալի արդյունքին: Պատճառն այն է, որ նրանք շարունակում են կրկնել նույն սխալները ամեն խաղի հետ: Եթե չեք ցանկանում գնալ նրանց ճանապարհով, մի՛ կրկնեք ձեր սեփական սխալները: Իհարկե, հեշտ է ասել, քան անել: Բայց, եթե վերլուծեք ձեր խաղերը, գտնեք ձեր սխալները, հաջորդ անգամ կխուսափեք դրանցից:

5. Մի՛ բողոքեք ձեր պարտություններից

Ի՞նչ են անում սիրողական շախմատիտներն իրենց պարտություններից հետո: Նրանք սկսում են բողոքել այն չարաբաստիկ հետևանքներից, որ թույլ չտվեցին իրենց հաղթել խաղը: Իսկ ի՞նչ են անում մասնագետները: Նրանք վերլուծում են խաղն ամբողջությամբ և փորձում գտնել իրենց սխալները, որպեսզի հաջորդ անգամ թույլ չտան նույն սխալները:
Պարզ ու շիտակ ալգորիթմ է, որը սկսվում է սեփական սխալներն ընդունելուց: Անհրաժեշտ է քայլեր ձեռնարկել դրանք շտկելու համար: Իսկ եթե դուք ընտրել եք բողոքելու տարբերակը և հրաժարվել պատասխանատվությունից, հիշե՛ք, որ դա ձեզ չի օգնի ավելի լավ շախմատիստ դառնալ:

6. Մի՛ ասեք` «չեմ կարող»

Շատ շախմատիստներ պարզապես ընտրում են «ես չեմ կարող» տարբերակը` առաջ գնալու փոխարեն: Նրանք պնդում են, որ ամեն ինչ փորձել են` գրքերից մինչև անհատական մարզիչներ, բայց ձախողվել են: 99% դեպքերը ցույց են տվել, որ այս շախմատիստները պարզապես չգիտեն, թե ինչպես սովորել և մարզվել: Նրանք արագ մի քանի լավ օրինակներ են աչքի անցկացնում, առանց դադար տալու և մտածելու այդ քայլերի մասին: Նրանք, իհարկե, կարող են դրական փոփոխություն ունենալ, նրանք պետք է պարզապես փոխեն իրենց մարզումների ոճը:

7. Մի՛ անտեսեք մարզումները

Շատ շախմատիստներ պարզապես շախմատ են խաղում, նրանք չեն վերլուծում իրենց հաղթանակներն ու պարտությունները, չեն ուսումնասիրում գրոսմայստերների խաղերը, խնդիրներ չեն լուծում, ժամանակ չեն հատկացնում միջնախաղերի և վերջնախաղերի սովորելու վրա: Փոխարենը ակնկալում են լավ արդյունքներ: Միգուցե նրանց մոտ դրական փոփոխություններ անգամ լինեն, բայց իհարկե որոշակի աստիճանի: Նրանք արագ փոփոխություն չեն արձանագրի առանց մարզվելու հստակ պլանով, վարժություններով, առաջադրանքներով և այլն:

8. Մի՛ վախեցեք խորհուրդ հարցնելուց

Ավելի ուժեղ շախմատիստից խորհուրդ հարցնելն ամենևին էլ թուլության նշան չէ, այլ հակառակը` ուժեղության: Շատ շախմատիստներ վարանում են խորհուրդ հարցնելուց, երբ հերթը հասնում է իրենց խաղին: Լավ խորհուրդը կարող է շատ բան փոխել: Հիշե՛ք դա և հաջորդ անգամ վստահ դիմե՛ք այդ քայլին:

 

9. Մի՛ փորձեք կատարյալ շախմատ խաղալ

Եթե ցանկանում եք հաղթանակ տանել, կարիք չկա խաղալու բացարձակապես լավագույն քայլերը: Պետք է պարզապես անեք ավելի լավ քայլեր, քան ձեր հակառակորդը: Դադարե՛ք փնտրել լավագույն քայլը բոլոր դիրքերի համար: Այդ ամենը ձեզ միայն ժամանակի սղության խնդրի առջև կկանգնեցնի: Լավ քայլեր անելն արդեն իսկ բավարար է, քանի դեռ չեք խաղում Կասպարովի կամ ուժեղագույն համակարգչային ծրագրերի հետ:

10. Մի՛ վարանեք ժամանակ և գումար հատկացնել շախմատին

Եթե ցանկանում եք լավ շախմատիստ դառնալ, չպետք է ափսոսաք ձեր ժամանակն ու ֆինանսական միջոցները` շախմատի լավ մարզող ծրագրերի, ինչպես նաև այլ լրացուցիչ նյութերի վրա: Եթե զգում եք, որ ձեզ անհատական մարզիչ է պետք, դիմեք նրա ծառայություններին, ով կուղեկցի ձեզ այդ ողջ ընթացքում: Հիմնականում, եթե հասնեք 2200 վարկանիշային միավորի, մարզիչն այլևս պարտադիր չի լինի, և դուք ինքներդ կարող եք աշխատել ձեզ վրա: Սակայն, հիշե՛ք, որ հետևելով մի քանի YouTube-յան տեսանյութերի, կարդալով հոդվածներ այստեղ կամ մեկ այլ տեղ, ձեր շախմատային մակարդակը չի բարձրանա որոշակի լուրջ փուլի: Հիշե՛ք, որ ամենակարևորը սիստեմատիկ մարզումներն են:

 


 

 




Նմանատիպ դասեր