Այսօր կխոսենք սկզբնախաղերի մասին, սակայն այսօրվա նյութը մի փոքր այլ կլինի նախորդներից, քանի որ կխոսենք այն սկզբնախաղերի մասին, որոնց համար չկա հստակ խաղաձև: Այլ կերպ ասած, կխոսենք այն սկզբնախաղերի մասին, որոնց երբեք նախկինում չեք բախվել և նույնիսկ չգիտեք, որ դրանք գոյություն ունեն:
Շախմատիստները սովորաբար իրենց մտքում ունեն սկզբնախաղերի «քարտեզ», գիտեն զարգացման հիմնական գաղափարը, թե ինչպես դասավորել խաղաքարերը, որ փոխատեղումը նախընտրել, կամ արժե արդյոք փոխատեղում կատարել ընդհանրապես, թե` ոչ, որ խաղաքարերը պահել, և որոնք փոխանակել, որ խաղաքարի վրա հարձակվել և այլն: Նրանք գիտեն նաև այն սովորական սխալները, որ սովորաբար թույլ են տալիս այս սկզբնախաղերի ժամանակ և ինչպես օգուտ քաղել դրանցից:
Եթե դուք խաղում եք պաշտպանվող կողմում, այն է` ձեր մտքում չունեք այդ քարտեզը, այս ուղեցույցը կօգնի ձեզ գլուխ բերել այդ անհայտ սկզբնախաղից և կծանոթացնի մի քանի միջոցների հետ, որ կօգնեն ձեզ դուրս գալ սկզբնախաղից առանց նյութական կորուստ ունենալու:
Եթե դուք հաճախ եք շախմատ խաղում, ապա համոզված կարելի է ասել, որ երբեմն բախվում եք այնպիսի սկզբնախաղերի, որոնք նախկինում երբեք չեք խաղացել, կամ չեք տեսել: Եթե սկսնակ շախմատիստ եք, ապա առավել հաճախ կարող եք հանդիպել նման անհայտ սկզբնախաղերի: Հետևաբար, եթե դուք սկսնակ եք, այսօրվա տեղեկատվությունը կարող է շատ օգտակար լինել ձեզ համար: Սակայն, նույնիսկ, եթե դուք երկար ժամանակ է, ինչ շախմատ եք խաղում, սակայն չունեք սկզբնախաղերի պաշար ձեր մտքում, ապա նույնպես կհայտնվեք նման իրավիճակում, երբ հակառակորդը անակնկալի կբերի ձեզ սկզբնախաղի նոր տարբերակով:
Եկե՛ք պատկերացնենք, որ դուք խաղում եք մի սկզբնախաղ, բայց ձեր հակառակորդը չի խաղում այն տարբերակը, որ դուք ակնկալում էիք: Այլ կերպ ասած, ի հայտ եկած դիրքը նախկինում երբեք չեք տեսել և չգիտեք, թե ինչպես կարելի է առաջ գնալ:
Հայտնվելով անծանոթ սկզբնախաղային դիրքում` որոշ կասկածելի պատճառներով շախմատիստները սկսում են արագ քայլեր անել, կարծես թե նախկինում բազմիցս խաղացել են այդ դիրքում: սակայն, անհրաժեշտ է հասկանալ, որ նման դեպքերում խորը վերլուծությունը ավելի քան անհրաժեշտ է: Իհարկե, Դուք չեք ցանկանա ցույց տալ հակառակորդին, որ պատկերացում անգամ չունեք, թե ինչպես է պետք խաղալ արդեն իսկ 2-րդ քայլից հետո, սակայն վատ քայլեր անելն ավելի վատ է: Արդյունքում, սխալներ թույլ կտաք և նյութական կորուստ կունենաք:
Լուծում․ երբ հայտնվում եք անծանոթ դիրքում, մի՛ շտապեք, մտածե՛ք: Շտապելով և անուշադիր քայլեր անելով` դուք ավելի կբարդացնեք ձեր վիճակը: Փոխարենը, մի շտապեք, վերլուծե՛ք դիրքը և հետագա ձեր քայլերի պլան մշակե՛ք:
Եթե ողջ սկզբնախաղի ընթացքում սխալ եք թույլ տալիս, կամ զգում եք, թե ձեր դիրքը վատն է, պետք է կարողանաք հանգստացնել ինքներդ ձեզ: Ինչքան շուտ գիտակցեք, որ պարտվում եք, այնքան ավելի շատ ժամանակ կունենաք խաղը փրկելու համար: Հետևաբար, դուք պետք է կամ պաշտպանվեք և փորձեք պահել ձեր խաղաքարերը, կամ որոշ խաղաքարեր զոհաբերեք` մտնելով խաղի մեջ: Երկու տարբերակներն էլ ռիսկային են, և թե որ տարբերակն է ավելի լավ, կօգնի հասկանալ տվյալ դիրքը:
Երբ շախմատիստները բախվում են անծանոթ սկզբնախաղերի, նրանք դիմում են երկու տարբեր ծայրահեղ քայլերի: Նրանցից շատերի մոտ վախ է առաջանում անծանոթ իրավիճակից և սկսում են պասիվ խաղ ցույց տալ: Այդ դեպքում հակառակորդը կարողանում է ձեռք բերել գերիշխող դիրք, լավ վերահսկողություն և հաղթում է խաղը: Մյուսներն էլ շատ ագրեսիվ խաղ են սկսում` չնայած, որ այնքան էլ չեն տիրապետում տարածքին: Նրանք հաճախ ընդունում են զոհաբերված խաղաքարը և արդյունքում հայտնվում ջախջախիչ, ավերիչ հարձակման կիզակետում:
Լուծում: Լավագույն տարբերակը ոսկե միջինն է: Ցանկացած սկզբնախաղում, հատկապես անծանոթ, դուք պետք է զարգացնեք խաղաքարերը և արքային անվտանգ դիրք տաք` նախքան հակառակորդի դեմ ինչ-որ գործողություն սկսելը: Իհարկե, կան բացառություններ, երբ դուք փոխատեղում չեք կատարում և հարձակում եք սկսում հակառակորդի արքայի դեմ: Անծանոթ սկզբնախաղում զոհաբերված խաղաքար ընդունելու փոխարեն կարելի է ձեր սեփական խաղաքարերը զարգացնել: Հակառակ տարբերակը շատ վտանգավոր է, և վաղ թե ուշ դժվար կացության մեջ կհայտնվեք. երկու զինվոր շահելու փոխարեն լավ կլինի պաշտպանել արքային` մատային դիրքից խուսափելու համար:
Ամփոփում`
Երբ անհայտ սկզբնախաղ եք խաղում, ավելի շա՛տ ժամանակ հատկացրեք դիրքի վերլուծության վրա, պլա՛ն մշակեք և խուսափե՛ք սխալներից:
Գիտակցե՛ք, որ խնդիրներ ունեք, և մի՛ հանգստացրեք ինքներդ ձեզ` մտածելով, որ ամեն ինչ հիանալի է: Ինչքան շուտ տեսնեք խնդիրը, այնքան շատ ժամանակ կունենաք խաղը փրկելու համար:
Ագրեսիվ մի՛ խաղացեք` զոհաբերված խաղաքար ընդունելով կամ չնախապատրաստված հարձակում գործելով:
Պասիվ խաղ մի՛ ցուցաբերեք` խաղաքարերը խաղատախտակին գամված պահելով և չշտկելով դրանց սխալ դասավորությունը: