Շատերն են հարցնում` ինչպես կարելի է ավելի ինքնավստահ լինել խաղատախտակի դիմաց: Նրանցից շատերը սակավ ինքնավստահության պատճառով պարտվում են պարտիաները, նույնիսկ այն դեպքում, երբ կարող էին հաղթել, կամ գոնե ոչ-ոքի արդյունք գրանցել: Ցածր ինքնավստահությունը սիրողական շախմատիստների համար մեծ խնդիր է, որը հաղթահարելու դեպքում կարող են հեշտությամբ անցնել հաջորդ փուլ: Այսօր կներկայացնենք 5 խթանիչ գործոն, որ կօգնեն բարձրացնել ձեր ինքնավստահությունը:
Ոչինչ այնքան չի բարձրացնում ինքնավստահությունը, որքան հաղթանակը: Իրականում, այնքան էլ հեշտ չէ հաղթել նույն մակարդակի հակառակորդին և շատ ավելի դժվար է հաղթել ձեզնից ավելի ուժեղ հակառակորդին: Սակայն, նունիսկ ձեզանից թույլ հակառակորդի նկատմամբ հաղթանակը կարող է բարձրացնել ձեր ինքնավստահությունը: Եթե պատրաստվում եք լուրջ մենամարտի, կարող եք նախապես ավելի թույլ շախմատիստների հետ պարտիաներ խաղալ և հաղթել, և հետևաբար բարձրացնել ձեր ինքնավստահությունը:
Եթե պատրաստվում եք լուրջ խաղի, կարելի է նախապես մի քանի հեշտ խնդիր լուծել` բարձրացնելու ձեր ինքնավստահությունը: Ընտրե՛ք այնպիսի խնդիրներ, որ կարող եք լուծել ոչ ավել, քան 30 վայրկյանում: Սա շատ ավելի արդյունավետ է, երբ նյարդայնացած եք լինում մրցաշարից առաջ: Հեշտությամբ լուծելով այս մի քանի խնդիրը` ինքնավստահ կգնաք դեպի հաղթանակ: Խորհուրդ չի տրվում փորձել դժվար խնդիրներ, քանի որ, եթե չկարողանաք լուծել դրանք, հակառակ արդյունքը կունենա` կնվազեցնի ձեր ինքնավստահությունը:
Ձեզանից ավելի թույլ շախմատիստին ինչ-որ սկզբնախաղ կամ շախմատային հասկացություն սովորեցնելը կարող է օգտակար լինել ոչ միայն նրա, այլև ձեզ համար` ավելի լավ հասկանալու այդ գաղափարը: Այս կերպ դուք նաև կբարձրացնեք ձեր ինքնավստահության մակարդակը` որպես շախմատիստ: Կարիք չկա ժամեր վատնել ամեն ինչ մանրամասն բացատրելու վրա. կարելի է 15 րոպե ծախսել` ձեր նախընտրած սկզբնախաղի հիմնական գաղափարը ներկայացնելու համար, կամ օրինակ` եռանկյունու կանոնը: Երկուսդ էլ կշահեք այս դասից:
Մանրամասն ուսումնասիրելով գրոսմայստերների խաղերը և հասկանալով յուրաքանչյուր քայլի նրբությունն ու իմաստը` կարող եք բարձրացնել շախմատային ձեր ինքնավստահությունը: Կարելի է ընտրել այն շամատիստի հարձակվողական խաղերից մեկը, որով հիանում եք, և սկսել ամբողջովին այն ուսումնասիրել: Իհարկե, կարող է դժվար լինել հասկանալ պրոֆեսիոնալ մակարդակի խաղը` կախված ձեր մակարդակից: Բայց այս դեպքում ևս լուծում կա. կարող եք ընտրել լավ մեկնաբանված պարտիա բարձր մակարդակի շախմատիստի կողմից:
Լավ մարզիչը կարող է բարձրացնել ձեր ինքնավստահությունը` մեծացնելով և՛ շախմատային գիտելիքները, և՛ գործնական հմտությունները: Նա կարող է մոտիվացնել ձեզ, երբ դրա կարիքն ամենից շատ եք զգում, կարող է խրախուսել ձեզ` հասնելու այն բարձր մակարդակին, որին ձգտում եք:
Շատ գործոններ կան, որ կարող են բարձրացնել ինքնավստահության ձեր մակարդակը, որոնցից ամենակարևորները պարտիաներ հաղթելն է և ջանասիրաբար աշխատելը շախմատի վրա: Այն շախմատիստները, ովքեր ջանք չեն խնայում աշխատելու և մարզվելու վրա, իրենց ավելի վստահ են զգում շախմատ խաղալիս: Այն շախմատիստները, ովքեր մարզիչներ ունեն և ապացուցված մարզումային պլան, լուրջ հոգեբանական առավելություն ունեն նրանց նկատմամբ, ովքեր այդպես չեն մարզվում:
Հիշե՛ք այս բոլոր գործոնները: Հաջողությո՛ւն: