Այսօրվա մեր նյութը կօգնի ձեզ նվազեցնել այն ճակատագրական սխալները, որոնց պատճառով շատ հաճախ պարտություն եք գրանցում: Ահա 7 կարևոր խորհուրդ, որոնց հետևելով՝ կկարողանաք նվազեցնել սխալներն ու դրանց հետևանքները`
Շախմատում սխալների քանակը նվազեցնելու ամենաարդյունավետ ձևը ևս մեկ անգամ քայլերը ստուգելն է: Միգուցե ձեզ համար սա շատ պարզ է, բայց, ինչքան էլ որ զարմանալի է, շատ շախմատիստներ անտեսում են այս խորհուրդը: Ստուգելով քայլերը և սխալներ թույլ չտալով`10-րդ քայլից հետո նրանք ինքնավստահություն են ձեռք բերում և դադարում ստուգել քայլերը: Եվ վաղ թե ուշ նրանք սխալ են թույլ տալիս` առանց հասկանալու, թե ինչպես դա պատահեց: Ստուգե՛ք ձեր բոլոր քայլերն առանց բացառության, որպեսզի խուսափեք հնարավոր սխալներից:
Սխալներից խուսափելու երկրորդ խորհուրդը կայանում է նրանում, որ յուրաքանչյուր քայլ անելուց առաջ պետք է հարցնեք ինքներդ ձեզ` «ինչո՞ւ»: Յուրաքանչյուր քայլ ունի իր իմաստն ու միտքը: Որպես շախմատիստ` դուք պետք է հասկանաք այդ միտքը, և եթե ձեզ հաջողվի անել դա, իհարկե, կկարողանաք մեղմացնել այն սպառնալիքներն ու ծուղակները, որ ձեր հակառակորդը լարում է ձեր դեմ:
Համաձայնեք, որ հաճախ է պատահել, երբ բնազդաբար քայլ անելուց հետո ստիպված եք եղել հանձնվել: Շախմատում չկան ակնհայտ քայլեր, որոնց կարելի է գնալ առանց մտածելու: Ինչքան շուտ հասկանաք դա, այնքան քիչ սխալներ թույլ կտաք: Եթե հաճախ եք բախվում այս խնդրի հետ, դիմե՛ք հետևյալ մեթոդին, ինչը կիրառվում է սկսնակներին մարզելիս. շախմատ խաղալիս նստե՛ք ձեր ձեռքերի վրա և յուրաքանչյուր քայլի վրա մտածե՛ք ամենաքիչը 30 վայրկյան, նույնիսկ եթե քայլը ակնհայտ է: Այս մեթոդը կմարզի ձեզ, որ միշտ մտածեք քայլն անելուց առաջ: Հավատացե՛ք՝ շատ խաղեր կփրկեք:
4. Աշխատե՛ք մարտավարական հնարքների վրա
Շատ հաճախ շախմատիստները սխալներ են թույլ տալիս մարտավարական հնարնքներին չտիրապետելու պատճառով: Այս խնդրից ազատվելու համար կարելի է ամեն օր խնդիրներ լուծել և այն դարձնել ձեր մարզումների բաղկացուցիչ մասը: Եվ շուտով դրական արդյունքներ կնկատեք:
Սխալներ թույլ տալու մեկ այլ բարենպաստ պայման եք ստեղծում, երբ խորությամբ չեք հաշվում քայլերը: Դուք սխալմամբ կարծում եք, թե հանդիպել եք հաղթական կոմբինացիայի և զոհաբերության եք գնում հանուն դրա: Սակայն, եթե մեկ քայլ առաջ մտածեիք, կտեսնեիք, որ այն իրականում տանում էր ձեզ դեպի պարտություն: Բայց դուք դա չգիտեիք, քանի որ գերադասեցիք խնայել ժամանակը: Արդյունքում՝ դուք զոհաբերության գնացիք և պարտվեցիք խաղը: Ինքներդ ձեզ այս տհաճ իրավիճակից ազատելու համար, ավելի խորը հաշվարկե՛ք ձեր քայլերը:
Ինչքան էլ զարմանալի թվա, բայց շախմատիստը ավելի է հակված սխալ թույլ տալու, երբ մոտ է հաղթանակին: Այդ պահին նա թուլանում է, թուլացնում է մտքի կենտրոնացումը, սխալ թույլ տալիս և շատ արագ պարտվում խաղը: Համոզված եմ, որ չեք ցանկանա նման պարտություն ունենալ: Հետևաբար, միշտ հիշե՛ք, որ մինչև վերջին քայլը անհրաժեշտ է կենտրոնանալ խաղի վրա և չթուլանալ: Եթե ձեր հակառակորդը կորցնում է թագուհուն, դա դեռ չի նշանակում, որ խաղն ավարտված է ի օգուտ ձեզ: Խաղը կավարտվի այն ժամանակ, երբ մատ հայտարարեք ձեր հակառակորդին, կամ նա հանձնվի: Հիշե՛ք դա ձեր հաջորդ խաղի ժամանակ:
Շատ շախմատիստներ սխալ են թույլ տալիս, հուսահատվում են և անմիջապես հանձնվում: Եթե միայն մի քանի րոպե մտածեն, միգուցե և տեսնեն, որ դեռևս խաղը փրկելու հնարավորություն կա: Երբ հաջորդ անգամ կոպիտ սխալ թույլ տաք, անմիջապես մի՛ հանձնվեք, մտածե՛ք մի քանի րոպե, գնահատե՛ք հետևանքները: Շատ դեպքերում դեռևս հնարավոր է փրկել խաղը: