ԵրբևԷ առանց մտածելու քայլ արե՞լ եք: Կարողանո՞ւմ եք արդյոք հեշտությամբ կենտրոնանալ խաղի ժամանակ: Սրանք այն խնդրներն են, որոնց բախվում են բոլորը: Այսօրվա մեր նյութը կբացահայտի այն 5 կարևոր սխալը, որոնցից պետք է խուսափել շախմատ խաղալիս:
Համար առաջին սխալը՝ իմպուլսիվ քայլեր անելն է: Հիշեք, թե քանի անգամ եք ավտոմատ գրավել հակառակորդի խաղաքարերը, փոխատեղում կատարել, կամ ակնհայտ քայլ արել: Հաճախ են նման դեպքեր պատահում, հատկապես սիրողական շախմատում:
Շատ հաճախ այս ավտոմատ քայլերի պատճառը ծուլությունն է, կամ վատ սովորությունները: Առանց մի քանի րոպե տրամադրելու, դուք անմիջապես քայլ եք անում` չմտածելով հետագա արդյունքի մասին: Միգուցե մեկ կամ երկու անգամ այդ քայլերը ստացվեն, բայց վաղ, թե ուշ այդ ծուլությունը կարող է լուրջ խնդիրների առջև ձեզ կանգնեցնել: Իսկ երբ արդեն բախվում եք այդ խնդիրներին, հույսը դնում եք այն բանի վրա, որ միգուցե հակառակորդը չնկատի հաղթական քայլը: Բայց առավել հաճախ նա գտնում է այդ քայլը:
Լավ նորություն նույնպես ունենք ձեզ համար. եթե անմիջապես նկատում եք թույլ տված սխալը, ապա դուք կարող էիք անպատճառ նկատել այն նույնիսկ նախքան խաղաքարին կպնելը: 10-20 վայրկյան հատկացրե՛ք այդ քայլին` նախքան այն անելը: Ստուգե՛ք այնպիսի պարզ բաներ, ինչպիսիք են` մատային սպառնալիքները, կախված խաղաքարերը և այլ մարտավարական ծուղակները:
Ինչի՞ մասին են մտածում պրոֆեսիոնալ շախմատիստները, ինչպիսիք են Կասպարովը, Կարլսենը, Կրամնիկը: Արդյո՞ք նրանք մտածում են իրենց նախկին պարտությունների մասին, իրենց սիրած հեռուստահաղորդման մասին, հանգստյան օրերի պլանների մասին: Համոզված եմ` ոչ: Եթե այդպես լիներ, նրանք ի վիճակի չէին լինի կենտրոնացնել ողջ ուշադրությունը խաղի վրա: Նրանք ավելի քան լավ գիտեն, որ պետք է ամեն ինչ մոռանալ շախմատ խաղալիս: Ցանկացած այլ միտք կարող է խոչընդոտել ձեր հաղթանակին:
Սիրողական շախմատիստներն այնքան էլ չեն փայլում իրենց մտքերը վերահսկելով: Եթե դիրքը նրանց համար ձանձրալի թվա, և խաղը դանդաղ ընթացք ունենա, նրանք կարող են պատահական քայլեր անել, ինչը ոչ մի կապ չունի տվյալ խաղի հետ: Նրանց համար շատ հեշտ է կտրվել բուն խաղից, հրապուրվել հարևան խաղատախտակի խաղով, մտածել այլ պլանների մասին և այլն:
Իրականում անհնար է լավ խաղալ` առանց ամբողջությամբ ձեր միտքը խաղի վրա կենտրոնացնելու: Եթե ցանկանում եք հաջողության հասնել շախմատում, սովորե՛ք մոռանալ ամեն ինչի մասին, ինչ չի վերաբերում տվյալ խաղին: Այս դեպքում դուք պարզապես կապշեք արդյունքից:
Ինտուիցիան լավ բան է, եթե այն աշխատում է: Այն կարող է ժամանակ և ջանք խնայել, բայց ոչ միշտ է աշխատում` ինչպես ճշգրիտ հաշվարկը: Կարելի է ասել, որ քանի դեռ չեք հասել 2200 վարկանիշային միավորի, մոռացե՛ք ինտուիցիայի մասին և խաղացե՛ք` հիմնվելով միայն հաշվարկների վրա: Հաշվարկե՛ք ձեր քայլերը և կազատե՛ք ձեզ մի շարք գլխացավանքներից:
Ի՞նչ նկատի ունենք` ասելով, թե շախմատը մի վերածեք մոլախաղի: Երբեմն շամատիստները հաշվի չեն առնում իրենց ինտուիցիան և առանց հաշվելու քայլեր են անում: Նրանք առաջնորդվում են փոխանակումներով և կոմբինացիաներով` հույս ունենալով, որ դա իրենց օգտին է աշխատելու: Նրանք պարզապես չեն մտածում տվյալ դիրքի մասին, որովհետև միգուցե հոգնած են, կամ դեռ չեն սովորել կիրառել դիրքը վերլուծելու իրենց հմտությունը: Նրանք պարզապես խաղում են և սպասում, թե ինչ արդյունք այն կունենա: Եթե այդ շախմատիստների շարքին եք պատկանում, ամեն ինչ այնքան էլ լավ չէ: Սա նման է մեքենա վարելուն` աչքերը փակ: Մի որոշ ժամանակ միգուցե այն լավ ընթանա, սակայն վաղ, թե ուշ վթարի կենթարկվի: Մեքենա վարելը, ինչպես և շախմատ խաղալը չպետք է հիմնվի բախտի վրա: Հիշե՛ք, որ շախմատը ճշգրիտ խաղ է. այն աշխատում է այն շախմատիստների օգտին, ովքեր կարողանում են ճշգրիտ հաշվարկներ անել:
Սա այն խնդիրն է, որն ունեն սիրողական շախմատիստները: Նրանք կորցնում են խաղաքարերից մեկը և անմիջապես հանձնվում: Նայելով գրոսմայստերների խաղերը, որտեղ խաղաքարի կորուստը կարող է հավասար լինել պարտության, հանձնվում են անմիջապես մի խաղաքար կորցնելուց հետո: Այն, ինչ ընդունելի է պրոֆեսիոնալ մակարդակում, այնքան էլ հասանելի չէ սիրողականում: Երբ խաղում եք մեկի հետ, ով ունի 2000-ից ցածր վարկանիշային միավոր, հավանականությունը մեծ է, որ նա կարող է սխալ թույլ տալ ի շահ ձեզ: Դուք կարող եք փոխհատուցում ստանալ և ոչ-ոքի կամ հաղթանակ գրանցել: Սակայն, երբ հանձնվում եք, կորցնում եք բոլոր հնարավորությունները և պարտություն գրանցում: Միևնույն է, այլևս ոչինչ չունեք կորցնելու: Հավաքե՛ք ինքներդ ձեզ և շարունակե՛ք խաղալ: