Վերջնախաղային ռազմավարություններ կամ` ինչպես ավելի շատ հաղթանակներ ունենալ - ChessSchool

Վերջնախաղային ռազմավարություններ կամ` ինչպես ավելի շատ հաղթանակներ ունենալ

Վերջնախաղային ռազմավարություններ կամ` ինչպես ավելի շատ հաղթանակներ ունենալ

Այսօրվա նյութը կօգնի ձեզ ավելի շատ հաղթանակներ ունենալ: Կարդալով այն, դուք բավականին լավ պատկերացում կկազմեք, թե ինչպես կարելի է շտկել շատ բաներ, որ նախկինում սխալ էիք անում և կկարողանաք հաղթանակ տանել կամ գոնե չպարտվել: Իհարկե, խոսքը վերջնախաղերի մասին է: Հետաքրքրե՞ց: Կարծում եմ` այո, քանի որ այսուհետ կկարողանաք ավելի լավ խաղ ցուցաբերել և հաղթել պարտիաները:
Բազմիցս խոսել ենք տարբեր վերջնախաղերի մասին, օրինակ` երկու փղով վերջնախաղը, նավակներով վերջնախաղերը և այլն: Սակայն այսօրվա թեման ավելի լայն պատկերացում կտա վերջնախաղային ռազմավարությունների մասին, որոնք կարելի է կիրառել տարբեր վերջնախաղերում:
Եվ այսպես, եկեք տեսնենք, թե որոնք են այդ ռազմավարությունները: Միգուցե դուք արդեն գիտեք դրանցից մի քանիսը, բայց այս ցանկը թույլ կտա ձեզ ճիշտ դասավորել դրանք ձեր մտքում:

  • Ակտիվացրե՛ք և կենտրոնացրե՛ք ձեր արքային։ Դուք հավանաբար արդեն գիտեք, որ արքան վերջնախաղում շատ արժեքավոր խաղաքար է, որով ցանկացած առաքելություն հնարավոր է ի կատար ածել, օրինակ` հարձակում հակառակորդի զինվորների և խաղաքարերի վրա, ինչպես նաև սեփական խաղաքարերի պաշտպանումը: Շատ կարևոր է իմանալ, թե երբ կարելի է օգտագործել արքային որպես զենք: Շատ հաճախ ավելի առաջատար դիրքում գտնվող արքայով հնարավոր է հաղթել խաղը: Ժամանակի ճիշտ կիրառումը շատ կարևոր է. պետք է ուշադիր լինեք  ձեր արքային ժամանակից շուտ չակտիվացնելու համար, երբ խաղատախտակին առկա են շատ խաղաքարեր, որոնք կարող են սպառնալիք լինել արքայի համար:
  • Զինվորներին առաջ մի՛ մղեք, քանի դեռ դրա անհրաժեշտությունը չկա։ Հավանաբար կմատածեք, որ այս մոտեցումը սխալ է: Չէ որ ենթադրվում է, որ պետք է հնարավորինս արագ առաջ տանել զինվորին և վերածել այն թագուհու: Այնքան էլ պարտադիր չէ: Իհարկե, եթե տեսնեք, որ ձեր զինվորի առաջխաղացման համար ոչ մի վտանգ չկա, ապա այժմ հենց ճիշտ ժամանակն է: Սակայն, երբ տեսնում եք, որ վտանգներ կան, ավելի լավ կլինի զբաղվել արքայի դիրքի բարելավմամբ: Հիշե՛ք, որ զինվորները չեն կարող հետ գնալ:)
  • Պահեստային տեմպ ունեցե՛ք։ Սա մեկ այլ պատճառ է, թե ինչու պետք չէ շարժել ձեր զինվորները: Կա մի այսպիսի հասկացություն` հանդիպակցություն: Դա պատահում է, երբ մի արքան կանգնած է մյուս արքայի դիմաց, և կողմերից և ոչ մեկը չի ցանկանում շարժվել և թույլ տալ հակառակորդի արքային ներխուժել: Եվ եթե դուք զինվորներով ունեք հավելյալ քայլեր, կհաղթեք հանդիպակցությունը և խաղը:
  • Ստեղծե՛ք զինվորային մեծամասնություն։ Սա շատ կարևոր է: Օրինակ, եթե դուք ունեք 2 զինվոր թագուհու թևի մեկ զինվորի դեմ, կարող եք անցունակ զինվոր ստեղծել: Ենթադրենք` դուք ունեք 2 զինվոր ընդդեմ արքայական թևի 3 զինվորի: Թագուհու թևի այդ անցունակ զինվորով դուք կարող եք հաղթել խաղը: Մինչ հակառակորդի արքան փորձում է կանգնեցնել զինվորին, դուք կարող եք վերցնել նրա արքայական թևի ողջ մեծամասնությունը և առաջ տանել ձեր զինվորները: Սա շատ կարևոր վերջնախաղային հասկացություն է, որը կօգնի ձեզ հաղթել շատ վերջնախաղեր:
  • Անցունակ զինվոր ստեղծե՛ք, զոհաբերե՛ք այն և շահե՛ք մյուս բոլոր զինվորները։ Ինչպես պատահեց վերը նշված օրինակում, բայց նույնը կարող է լինել նաև ցանկացած մեկուսացած անցունակ զինվորով։
  • Ավելի խորը հաշվարկ արե՛ք։ Իհարկե,  այս գործոնը պարտադիր է խաղի բոլոր փուլերում, սակայն վերջնախաղում այն հատկապես կարևոր է, քանի որ չկան շատ խաղաքարեր և տարբերակներ: Հաշվե՛ք` արդյոք կարող եք առաջինը փոխարկել ձեր զինվորը, կարող եք արդյոք հասնել հակառակորդի զինվորին, կամ կարող է արդյոք ձեր հակառակորդը կանգնեցնել ձեր զինվորին: Առաջ նայելով` դուք ավելի շատ հնարավորություններ կունենաք հաղթելու խաղը:
  • Ճիշտ որոշում կայացրե՛ք, թե ինչ խաղաքար ընտրել: Եթե տարբերակ ունեք ընտրելու, թե որ խաղաքարով խաղալ վերջնախաղ մտնելիս, հետևեք այս ուղեցույցին`

      -  եթե դիրքը բաց է և խաղատախտակի երկու կողմում էլ զինվորներ կան, փիղն ավելի ուժեղ է, քան ձին

      - եթե դիրքը փակ է, ավելի լավ է նախապատվությունը տալ ձիուն,

      - եթե ձեր հակառակորդը գերազանցում է զինվորների քանակով, ավելի լավ կլինի անցնել տարադաշտ փղերով վերջնախաղի, որտեղ նույնիսկ 2 զինվոր պակաս ունենալով հանդերձ հնարավոր է ոչ-ոքի ունենալ (որոշ դեպքերում, ոչ միշտ),

      -  եթե ավելի շատ զինվորներ ունեք, պետք է ընտրեք միագույն փղերի վերջնախաղը` հաշվի առնելով վերը նշված պատճառը:

  • Նավակներով վերջնախաղերում`

       - եթե դուք մեկ զինվոր ավել եք , փորձե՛ք հեռու պահել ձեր հակառակորդի արքային ձեր զինվորից,

       - եթե հակառակը՝ մեկ զինվոր պակաս եք, փորձե՛ք ձեր արքային մոտ պահել հակառակորդի զինվորին:




Նմանատիպ դասեր