Այսօր կքննարկենք կարևորագույն դիրքային տարրերից մեկը՝ տարածքային առավելությունը։ Բնականաբար, շատ տարածություն ունենալն ավելի հաճելի է։ Կարող ենք դա համեմատել սենյակի կամ տան հետ։ Մեծ տարածությունը, բարձր պատերն ավելի հարմարավետ են, քան փոքրիկ սենյակները, որտեղ դժվարությամբ կարող եք տեղաշարժվել։ Այնպես չէ՞։ Նույնը գործում է և շախմատային խաղի ընթացքում։ Տարածքային առավելությունը հնարավորություն է տալիս Ձեր խաղաքարերին ազատորեն տեղաշարժվել՝ միաժամանակ սահմանափակելով Ձեր հակառակորդի խաղաքարերի հնարավորությունները։
Այստեղից պարզ է դառնում, որ տարածքային առավելություն ունենալու դեպքում պետք է խուսափել փոխանակություններից, քանի որ այդպիսով հակառակորդի խաղաքարերը կխանգարեն միմյանց և ավելի քիչ տարածք կունենան տեղաշարժվելու համար։ Հետևաբար այն կողմը, որը պայքարում է տարածքային առավելության դեմ, պետք է փորձի գնալ ավելի շատ փոխանակությունների։
Քանի որ տարածքային առավելությունը կախված է զինվորային կառուցվածքից, որն այդքան էլ հեշտ չէ փոփոխել, տարածքային առավելությունը երկարաժամկետ առավելություն է, հետևաբար պետք չէ շտապել այն իրացնելիս։ Կարոք եք հնարավորինս բարելավել Ձեր խաղաքարերի համագործակցությունը մինչ վճռական քայլերի դիմելը։ Հակառակորդը չի ունենա հակախաղի հնարավորություն և ստիպված կլինի պասիվորեն սպասել։
Եկեք դիտարկենք Կարպով-Ունցիկեր խաղը, որտեղ աշխարհի 12-րդ չեմպիոնը լավագույնս ցուցադրում է, թե ինչպես է պետք խաղալ տարածքային առավելության դեպքում։
Դիրքային փայլուն խաղ Կարպովի կողմից։
Այս խաղը չուներ դինամիկ ընթացք, սակայն դա չի նշանակում, որ այդպիսի խաղի դեպքում հնարավոր չէ օգտագործել տարածքային առավելությունը։ Հաջորդ խաղում կհամոզվեք դրանում։
Աշխարհի առաջին չեմպիոնի կողմից այս գերազանց խաղը միայն ապացուցում է, որ դիրքային առավելություն ստանալու համար կարելի է նաև որոշակի նյութական զիջումների գնալ։
Հուսով եմ հավանեցիք այս օրինակները և այժմ ավելի շատ ուշադրություն կդարձնեք տարածքային առավելությանը և դրան համապատասխան ճիշտ մարտավարություն կընտրեք։