Ինչպե՞ս գերազանցել ձեզանից ավելի ուժեղ հակառակորդին
Ինչպե՞ս գերազանցել ձեզանից ավելի ուժեղ հակառակորդին
Երբևէ՞ շախմատ խաղացել եք ձեզանից 400 միավոր բարձր վարկանիշ ունեցող հակառակորդի հետ: Եթե հաճախակի եք խաղում, ապա անպայման խաղացած կլինեք: Ըստ վիճակագրական տվյալների` 95% դեպքերում 400 միավոր բարձր վարկանիշ ունեցող շախմատիստը կհաղթի: Սակայն, չի կարելի հիասթափվել: Կարդալով այս նյութը և հետևելով ստորև ներկայացված խորհուրդներին, դուք կարող եք դասվել այն 5% -ին և շանսեր ունենալ ոչ-ոքի, նույնիսկ հաղթական արդյունք գրանցել: Այսպիսով, որոնք են այն առավելությունները, որոնց շնորհիվ այս բարձր վարկանիշ ունեցող շախմատիստները հաղթում իրենց թույլ հակառակորդներին. նրանք առաջին հերթին լավ են մարզված, նրանք շատ լավ գիտեն սկզբնախաղերը, ունեն շախմատային տեսողական պատկերացում, նրանց մարտավարական մակարդակը բարձր է և նրանք գիտեն` ինչպես խաղալ և հաղթել տեսական վերջնախաղերում:
Դուք այժմ կմտածեք, թե ինչպես կարելի է հաղթել այդ շախմատի հրեշին: Ստորև կգտնեք մի քանի խորհուրդներ, որ հետևելով կկարողանաք հաջողություն գրանցել ընդդեմ ավելի ուժեղ հակառակորդի:
Առաջին բանը, որ պետք է անել հանգստանալն է և չնյարդայնանալը: Մի՛ վախեցեք ձեր հակառակորդից, նույնիսկ եթե նա 2200 վարկանիշային միավոր ունի, իսկ դուք միայն 1300. նույնիսկ այս դեպքում դուք հաղթելու հնարավորություն ունեք: Եթե հետևեք ուժեղագույն շախմատիստների խաղերը, կտեսնեք, որ նրանք միշտ հանգիստ են և կենտրոնացած իրենց խաղի վրա: Նյարդային վիճակում, շախմատիստներն ի վիճակի չեն ճիշտ քայլեր անելու: Միայն այն դեպքում կկարողանաք գտնել լավագույն քայլերը, երբ կենտրոնանաք և կտրվեք արտաքին աշխարհից,
Ավտոմատ կերպով մի՛ փոխանակեք խաղաքարերը: Շատ թույլ շախմատիստներ կարծում են, որ, եթե փոխանակեն շատ խաղաքարեր, վերջնախաղում կկարողանան ոչ-ոքի արդյունք գրանցել: Նման մոտեցումը շատ սխալ է: Իհարկե, եթե փոխանակեք բոլոր խաղաքարերն ու զինվորները, դուք կունենաք ոչ-ոքի արդյունք: Բայդ ուժեղ կողմը երբեք դա թույլ չի տա: Այս դեպքում, երբ թույլ կողմը փորձի փոխանակել խաղաքարերը, առավել հավանական է, որ նա փոխարինի իր ակտիվ խաղաքարերը հակառակորդի ոչ ակտիվ խաղաքարերի հետ: Ուժեղ կողմի առավելությունը կաճի, և նա գրեթե կպարգևատրվի հաղթանակով: Եթե նույնսիկ փոխանակեք խաղաքարերի մեծ մասը, միևնույն է ուժեղ կողմը ամենայն հավանականությամբ ձեռք կբերի այն որոշիչ միավորը, քանի որ ուժեղ շախմատիստները սովորաբար ծանրակշիռ վերջնախաղ են ցուցաբերում:
Ցանկացած հակառակորդի դեմ պետք է ակտիվ խաղ ցուցաբերել: Մի՛ նստեք և սպասեք` կատարելով միայն պասիվ պաշտպանողական քայլեր: Եթե այդպես խաղաք, ուժեղ կողմը պարզապես կակտիվացնի իր բոլոր խաղաքարերը և անվերջ սպառնացող հարձակումներ կտեղա ձեզ վրա: Հիշե՛ք, որ պաշտպանության լավագույն ձևը հարձակումն է: Եթե ձեր հակառակորդը հարձակվի ձեր թագուհու թևի վրա, պատասխանեք նրան` հարձակվելով նրա արքայական թևի վրա ձեր զինվորների միջոցով, որոնք պետք է ունենան ձեր մյուս խաղաքարերի աջակցությունը: Փորձե՛ք առավելագույնս բարդացնել իրավիճակը նրա համար: Պայքարե՛ք: Երբեք մի՛ նահանջեք և թույլ մի՛ տվեք ձեր հակառակորդին վերահկողության տակ վերցնել խաղը: Եթե ձեզ լավ եք զգում բաց դիրքերում, փորձեք ավելի ու ավելի շատ ուղղաձիգեր բացել և տեղափոխել ձեր ծանր խաղաքարերը (նավակ, թագուհի) բաց կամ կիսաբաց ուղղաձիգերի վրա: Եթե ավելի լավ եք զգում դիրքային խաղում կամ փակ դիրքերում, դուք պետք է խուսափեք զինվորային փոխանակումներից: Ստիպե՛ք ձեր հակառակորդին խաղալ ձեր թելադրած խաղը, և մի՛ խաղացեք նրա թելադրածը:
Հիշե՛ք, որ ոչ-ոքի խաղալը վատ ռազմավարություն է: Եթե այդպես տրամադրվեք, ամենայն հավանականությամբ կպարտվեք խաղը: Ոչ-ոքի խաղալու համար անհրաժեշտ է ակտիվ խաղ ցուցաբերել, սակայն դա չի նշանակում, որ դուք պետք է հարձակվեք հենց առաջին քայլից, զոհաբերեք մի քանի զինվորներ և այլ խաղաքարեր և հետո հասկանալ, որ ձեր հարձակումը այն արդյունքը չտվեց, ինչին ձգտում էիք,քանի որ ձեր հակառակորդն ունի մի փիղ, որը պաշտպանում է մատային դաշտը, ինչը դուք չեիք նկատել: Նման դեպքերը հաճախ են պատահում շախմատում, նույնիսկ բարձր մակարդակի խաղերում: Այսպիսով, եթե ուժեղ հարձակման հնարավորություն եք տեսնում, նույնիսկ նյութական կորստի գնով, արեք դա: Սակայն, նախքան խաղաքարը զոհաբերելը, մտածեք` արդյոք այդ դիրքը ձեզ առավելություն կտա: Հաշվե՛ք 3 անգամ այդ քայլին գնալուց առաջ: Միգուցե դա ձեզ պարտության տանի: Հանգամանալից հաշվարկները շատ կարևոր են տակտիկական խաղի ժամանակ: Լասկերը մի անգամ ասել է. «Ավելի լավ է պարտվել ձեր ձևով, քան հակառակորդի…»:
