Շախմատն այն խաղն է, որը կարելի է սովորել ցանկացած տարիքում: Շախմատն այն հազվադեպ սպորտաձևերից է, որտեղ 10 տարեկան երեխան կարող է հաղթել տարիների փորձ ունեցող հակառակորդին: Շատ ուսումնասիրություններ ցույց են տալիս, որ շախմատը ոչ միայն հետաքրքիր է, այլև շատ օգտակար. շախմատը բարելավում է մի շարք հատկություններ, որ անհրաժեշտ են հաջողության հասնելու համար ոչ միայն ուսման մեջ, այլև աշխատանքում` հիշողություն, կենտրոնանալու ունակություն, քննադատական մտածողություն, տրամաբանություն, երևակայություն, ստեղծագործ միտք և այլն:
Շախմատը շատ բարդ խաղ է, որը լավ հիշողություն է պահանջում բարձրակարգ խաղ ցույց տալու համար, քանի անհրաժեշտ է հիշել այն բոլոր բարդ սկզբնախաղերն ու վերջնախաղերը: Լավ հիշողությունը անհրաժեշտ է ոչ միայն ուսման և աշխատանքի մեջ, այլև ցանկացած բնագավառում:
Կենտրոնանալու հմտությունը նույնպես շատ կարևոր գործոն է, որ կարելի է ձեռք բերել շախմատի շնորհիվ: Աղմկոտ սրահներում խաղալով դուք աստիճանաբար կզարգացնեք այս հատկությունը ևս, ինչը մեծ առավելություն կտա ձեզ աշխատանքում և ուսման մեջ:
Շախմատը զարգացնում է նաև քննադատական մտածողություն և տրամաբանություն: Լավ շախմատ խաղալու համար անհրաժեշտ է հասկանալ խաղաքարերի համակարգման հետևում կանգնած տրամաբանությունը: Շախմատիստը պետք է կարողանա ճիշտ տարբերակներ գտնել ցանկացած իրավիճակում, օրինակ, երբ հիվանդ եք, կամ գրեթե պարտված եք, կամ ընդհամենը երկու րոպե է մնացել: Շախմատիստը պետք է նաև կարողանա ճիշտ գնահատել ցանկացած դիրք, որ կարող է առաջ գալ խաղի ժամանակ: Ցանկացած ինտելեկտուալ աշխատանք պահանջում է տրամաբանություն և քննադատական մտածողություն:
Շախմատը նաև այն խաղն է, որը պահանջում է երևակայություն և ստեղծագործ միտք: Շախմատիստները պետք է կարողանան լուծում գտնել անհույս պարտված դիրքում, երբ թվում է, թե անհնար է որևէ լուծում տալ կամ օգնություն ստանալ: Հենց այստեղ օգնության կարող է հասնել երևակայությունը կամ ձեր ստեղծարար միտքը, որի շնորհիվ կարող եք հաղթանակ ձեռք բերել գրեթե պարված դիրքում: Աշխարհի 14-րդ չեմպիոն Վլադիմիր Կրամնիկը շախմատը համարում է խաղի և արվեստի ընդհանրություն: Ցանկացած աշխատանք պահանջում է լինել ստեղծարար և օրիգինալ: Հիշե՛ք Google-ը կամ Facebook-ը: