Մենք բոլորս ցանկանում ենք բարելավել մեր խաղը, դառնալ ավելի լավ շախմատիստներ և հաղթել զգալիորեն ավելի շատ պարտիաներ։ Պարտիայի վերլուծությունը կարևոր գործիք է, ավելի ճիշտ՝ կարևոր տեխնիկա, որը, ճիշտ կիրառելու դեպքում կարող է աջակցել քեզ թույլ կողմերդ շտկելու և ուժեղ կողմեր զարգացնելու հարցում։
Վերլուծության նկարագիրը․
Պարտիան ավարտված է․ միգուցե հաղթել ես, միգուցե ոչ ոքի խաղացել կամ ցավալի պարտություն կրել։ Անկախ արդյունքից և զգացողություններից՝ վերլուծության հարցում կարևոր է գործել ինչպես պրոֆեսիոնալ շախմատիստ՝ պարտիայից մաքսիմալ օգուտ ունենալու համար։ Դու պետք է պարտիայի մասին արագ գրառումներ անես անմիջապես պարտիայից հետո որքան հնարավոր է շուտ, երբ այն դեռ թարմ է քո հիշողության մեջ։ Հատկապես կենտրոնացիր քայլերի վրա, որտեղ դու ստիպված էիր բարդ ընտրություն կատարել, (երբ պարտիան զգալիորեն փոխում է իր դիրքը (դիրքային -> տակտիկական, և այլն)։
Լավ կլինի պարտիան բաժանել երեք մասի՝ սկզբնախաղ, միջնախաղ և վերջնախաղ։ Պարտիայի այս երեք փուլերը պահանջում են ինդիվիդուալ վերլուծություն և պետք է նրանց վերաբերվել առանձին-առանձին։
Սկզբնախաղ
Սկզբնախաղ վերլուծելիս դու պետք է փորձես հասկանաս՝ արդյոք քո խաղացած տարբերակը այն է, ինչն արդեն պարապել ես, թե հակառակորդդ քեզ հետ հազվադեպ հանդիպող տարբերակ է խաղացել։
Գրի առ մտքերդ քո խաղացած տարբերակի շուրջ։ Արդյոք այն հիմնավոր տարբերակ էր։ Միայն մտքերդ գրի առնելուց հետո կարող ես դիմել սկզբնախաղային դատաբազայի օգնությանը՝ ստուգելու այդ տարբերակի գոյությունը շամատային տեսության մեջ։ Դու կարող ես հիասթափվել, երբ պարզես, որ հակառակորդիդ խաղացած տարբերակը անհաջող տարբերակ էր, բայց դու միևնույնն է չկարողացար հաղթանակ տանել։ Շատ կարևոր է սա հաշվի առնել։ Սա նշանակում է, որ դու խաղից ինչ-որ բան ես ստացել։ Դու պետք է սովորես այս սկզբնախաղից մի քանի պարտիա՝ բարձր վարկանիշ ունեցող շախմատիստների կողմից խաղացված, և համապատասխանորեն հարմարեցնես քո սկզբնախաղային խաղացանկին։ Հաջորդ անգամ այս տարբերակին հանդիպելիս դու ավելի լավ պատրաստված կլինես։
Միջնախաղ
Սա պարտիայի այն փուլն է, որը գալիս է սկզբնախաղի <<տեսական>> քայլերից անմիջապես հետո։
Գրի առ, թե ինչու ես որոշել խաղալ այս կամ այն քայլը, կարող ես նաև նշել այլընտրանքային քայլեր, որոնց շուրջ մտածել ես (օրինակ՝ ես մտածում էի խաղալ փd7, բայց վախեցա e5 քայլից)։ Նշիր տակտիկական մտքերդ որ ունեցել ես՝ ներառելով հավանական զոհաբերությունները, որոնց շուրջ մտածել ես։ Կարևոր է ձևակերպել խաղի պլանը։ Օրինակ, կարող է լինել Թագուհու թևի զինվորների գրոհ հակառակորդի Արքայի դեմ, ճնշում մեկուսացած զինվորի նկատմամբ և այլն։ Հիշիր ինչ է ասել Բոտվիննիկը․ <<վատ պլանը շատ ավելի լավ է, քան ընդհանրապես պլան չունենալը>>։
Վերջնախաղ
Վերջնախաղում դու պետք է ուշադրություն դարձնես նախնական դիրքին և փորձես հանդես գալ հաղթական կամ ոչ-ոքի տանող պլանով, (եթե դիրքդ ավելի վատ է)։
Եթե դու սկսում ես ժամանակի հետ հաճախ խնդիր ունենալ, կարող ես վերլուծել, թե ինչպիսի որոշումները քեզնից շատ ժամանակ խլեցին և կոնկրետ որտեղ ես ծախսել ժամանակիդ մեծ մասը։ Ժամանակի հետ կապված խնդիրներից խուսափելը շատ կարևոր է, քանի որ շախմատային պարտիաների արդյունքի համար ժամաակը վճռորոշ դեր է խաղում։