Օնլայն շախմատը զվարճալի է, այն հրաշալի է և հեշտ է խաղալ։ Բայց երբևէ մտածե՞լ ես, թե ինչքան ժամանակ ես ծախսում օնլայն շախմատ խաղալու համար և ավելի ուշ զարմանում, թե ինչու լավ չես խաղում փայտյա խաղատախտակի առջև։ Օնլայն խաղալիս շատերը արագ շախմատ են խաղում՝ 10 կամ 15 րոպե և նույնիսկ ավելի քիչ խաղաժամանակով։ Այսպիսի պարտիաները չեն բարելավի քո՝ ստանդարտ ժամանակով խաղալու հնարավորությունները։
Մտածի՛ր այդ մասին։ Երբ օնլայն խաղացողներն իրենց օնլայն սկզբնախաղերով գալիս են <<իրական աշխարհի>> շախմատային առաջնություն, նրանք, սովորաբար, <<հարվածի են ենթարկվում>> հենց սկզբնախաղում։ Հիմա կհարցնեք թե ինչու։ Բանն այն է, որ նրանք սովոր են արագ շախմատ խաղալուն, ուստի նրանք մեծ ուշադրություն չեն դարձնում իրենց սկզբնախաղին։ Եթե դու վարպետ չես, 10 րոպեում շատ դժվար է օգտագործել հակառակորդի սխալները։ Համենայն դեպս, խաղատախտակի առջև ստանդարտ ժամանակով խաղալիս շախմատիստները շատ ժամանակ ունեն մտածելու, թե ինչու է այդ ձին վատ դիրքով անկյունում կանգնած և ինչու է այդ մեկուսացած զինվորը հակառակորդի պաշտպանության թույլ կողմը հանդիսանում։ Իրականում շախմատիստները կօգտագործեն հակառակորդի այս երկու թուլությունը, և վերջինս ստիպված կլինի դժվարությունների միջով անցնել պաշտպանվելու համար։ 10 րոպեանոց խաղի ժամանակ զինվորների թուլությունը կամ ֆիգուրի վատ դիրքում կանգնած լինլը մեծ խնդիր չէ, քանի որ հակառակորդը, եթե նույնիսկ փորձի մտածել այդ բոլորի մասին, նրա ժամանակը կավարտվի և խաղը տանուլ կտա։
Հաջորդը հոգեբանական գործոնն է, որն օնլայն շախմատը իրական շախմատից շատ տարբեր է դարձնում։ Երբ ինչ-որ մեկը օնլայն շախմատ է խաղում, նա կարող է նստել կամ նույնիսկ գիշերանոցով պառկել նոթբուքի առջև, երաժշտություն միացնել և խաղալ։ Նա չգիտի, թե ինչպիսի տեսք ունի իր հակառակորդը, ով է նա և ինչպիսի ռեակցիա է ցույց տալիս յուրաքանչյուր քայլին։ Խաղացողը միայն տեսնում է էկրանի վրա փոքր խաղատախտակը։ Հիմա պատկերացրեք այլ պատկեր․ շախմատիստը նստած է դահլիճում, որտեղ կան հարյուրավոր այլ շախմատիստներ, նրա առջև նստած է իր հակառակորդը, ով կարծես փորձում է անել ամեն ինչ իրեն խանգարելու համար, խուճապ առաջացնելու համար, որպեսզի վախեցնի հակառակորդին և, ի վերջո, հաղթանակ տանի։ Այո, սա հաճախ պատահում է։ Հակառակորդները սիրում են գրիչով տկտկացնել, հետ ու առաջ քայլել, կոկորդը մաքրել երբ հակառակորդի ժամանակը սուղ է, ուշադիր նայել հակառակորդին, ժամացույցին հարվածել ամբողջ ուժով և այլն։ Շախմատիստները, ովքեր խաղում են խաղատախտակի առջև, գիտեն, թե ինչպես պետք է հաղթահարել այդ ամենը, հակառակ դեպքում՝ նրանք տանուլ կտան յուրաքանչյուր պարտիան՝ նույնիսկ եթե երկու անգամ ավելի ուժեղ լինեն իրենց հակառակորդից։ Ինչպես Ջուդիթ Փոլարն է ասել, <<Շախմատը 60%-ով հոգեբանություն է>>։ Սա շատ ճիշտ է իրական շախմատի համար։
Եթե շախմատ ես խաղում ուղղակի հաճույքի համար և ազատ ժամանակ արագ շախմատ ես խաղում, միանգամայն նորմալ է։ Բայց եթե դու շախմատին ավելի լուրջ ես վերաբերվում և օնլայն արագ շախմատ խաղալով ցանկանում ես ավելի լավ խաղալ սովորել խաղատախտակի առջև, ապա դա չի օգնի, դու պետք է ավելի քիչ ժամանակ տրամադրես օնլայն խաղալուն և ավելի շատ ժամանակ տրամադրես պարապելուն։