Շատ շախմատիստներ կարծում են, թե սկզբնախաղերում նրանք առավել թույլ են: Սակայն, անկախ այն փաստից, արդյոք դա ճիշտ է, թե ոչ, անհրաժեշտ է աշխատել շախմատի բոլոր էլեմենտների վրա, և սկզբնախաղերն այստեղ բացառություն չեն: Ստորև կփորձենք ներկայացնել այն 5 միջոցը, որոնց շնորհիվ կկարողանաք բարելավել ձեր սկզբնախաղերը:
Ցանկացած շախմատային սկզբնախաղ ուսումնասիրելիս անհրաժեշտ է նախ և առաջ հասկանալ տվյալ սկզբնախաղի հիմնական գաղափարները: Շատ շախմատիստներ սխալ մոտեցում են դրսևորում` փորձելով մտապահել տարբերակաները, մինչդեռ անհրաժեշտ է սովորել, թե ինչպես է պետք խաղալ տվյալ սկզբնախաղը: Քայլերը կուրորեն մտապահելու փոխարեն շատ ավելի արդյունավետ կլինի հասկանալ պլաններն ու հակապլանները երկու կողմի համար էլ: Այսպիսով՝ Դուք չեք մոլորվի, երբ ձեր հակառակորդը որոշի շեղվել այն հիմնական ուղիներից, որոնք դուք սովորել եք: Դուք կիմանաք սկզբնախաղի հիմնական գաղափարները, դրան բնորոշ հարձակումները և այլն:
Երբ սովորեք և հասկանաք սկզբնախաղի հիմնական գաղափարն ու պլանները, ավելի շատ ժամանակ պետք է հատկացնեք զինվորային կառույցների ուսումնասիրման վրա: Յուրաքանչյուր սկզբնախաղ ունի իրեն յուրահատուկ զինվորային կառուցվածք:
Եթե ուզում եք լավ խաղալ սկզբնախաղերում, պետք է հասկանաք այդ զինվորային կառույցների առավելություններն ու թերությունները, ինչպես նաև սովորեք տիպիկ խաղաքարային դասավորության մասին:
Այս կետն առավել կարևոր է, քանի որ խաղաքարերի ճիշտ դասավորությունը միջնախաղում ձեզ համար հաջողություն կապահովի:
Երբ հասկանաք հիմնական գաղափարներն ու զինվորային/խաղաքարային կառույցները, անցե՛ք հաջորդ քայլին` ուսումնասիրեք նույն սկզբնախաղերը, որ հանդիպել են վարպետների խաղերում: Երբ վերլուծեք բարձր մակարդակի խաղերը, կկարողանաք ավելի լավ հասկանալ այդ սկզբնախաղերը և դրանց բնորոշ հարձակումներն ու պաշտպանությունները:
Ինչքան շատ նման բարձր կարգի խաղեր վերլուծեք, այնքան ինքնավստահ կզգաք դրանք խաղալիս, և, հետևաբար, աստիճանաբար կնկատեք ձեր առաջընթացը:
Վերլուծելու համար մի՛ ընտրեք այն խաղերը, որ վերջերս խաղացել են ժամանակակից շախմատիստները: Ավելի արդյունավետ է սկսել ավելի վաղ խաղացած պարտիաներից, և միայն հետո դրանց ժամանակակից տարբերակները:
Շատ կարևոր է սկզբնախաղային բազա կազմելը, որտեղ կկարողանաք զետեղել սկզբնախաղային ձեր պատրաստվածության գաղափարներն ու մտքերը: Բոլոր գրոսմայստերներն էլ դիմում են այս միջոցին: Այս միջոցը ավելի է խորացնում սկզբնախաղային ձեր գիտելիքները: Ցավոք, սկսնակները չեն գիտակցում այս գործոնի կարևորությունը և նախընտրում են ժամանակ խնայել նման «անիմաստ» գործով չզբաղվելով:
Սկզբնախաղային ձեր խաղացանկը բազայի վերածելով, դուք շատ բաներ կհասկանաք, որ նախկինում չէիք էլ նկատել, կհասկանաք այն ուղիները, որ ձեզ միգուցե տանեն դեպի հաղթանակ, և որոնք` դեպի պարտություն: Այս արժեքավոր ինֆորմացիային տիրապետելով` կկարողանաք բարելավել ձեր պատրաստվածությունը և ավելի լավ արդյունքներ կարձանագրեք:
Սկզբնախաղերը բարելավելու վերջին քայլը ավելի շատ գործնական փորձ ձեռք բերելն է: Նոր սկզբնախաղը գործնականում կիրառելու համար դիմե՛ք արագ շախմատի օգնությանը` փորձելով նոր մտքերը:
Իհարկե, ընդունված չէ բլիցը որպես մարզվելու միջող կիրառելը, սակայն այս պարագայում այն բացառություն է կազմում: Շատ գրոսմայստերներ խորհուրդ են տալիս բլից խաղալ` սկզբնախաղերը փորձարկելու համար: