Շախմատում գոյություն ունեն որոշակի ակնհայտ քայլեր, որոնք ընդունված է կատարել կոնկրետ դեպքերում, օրինակ՝ փոխանակության ժամանակ ետ վերցնել հակառակորդի խաղաքարը կամ հեռացնել հարվածի տակ գտնվող խաղաքարը։ Շատ հաճախ չենք էլ մտածում այլ քայլերի մասին՝ բաց թողնելով հրաշալի հնարավորությունները հասնել առավելության միջանկյալ շախի կամ այլ ստիպողական քայլերի միջոցով։
Դիտարկենք մի քանի օրինակ ։ Նշենք, որ այժմ կարող եք տեղաշարժել տախտակի խաղաքարերը և քայլ առ քայլ հետևել դիրքի փոփոխություններին։
Տրամագիր 1
Տրամագիր 1-ում սպիտակները 1․d5 քայլով դրդում են սևերին փղերի փոխանակության, սակայն 1․․․Փxc3-ին սպիտակները ոչ թե միանգամից ետ են վերցնում փիղը, այլ կատարում են միջանկյալ 2.d6+ քայլը` ստանալով հզոր պաշտպանված անցողիկ։ Սևերը ստիպված են հեռացնել արքային շախից և սպիտակները կարող են վերցնել փիղը՝ նյութապես հավասարեցնելով դիրքը, սակայն մնալով դիրքային առավելությամբ ։
Տրամագիր 2
Տրամագիր 2-ում սևերը 1․․․Ձxe5 քայլով իրականացնում են բաց հարձակում։ Այժմ սպիտակները ստիպված են հարվածի տակից հեռացնել կամ փոխանակել թագուհիները՝ 2․Թxd8, ինչին հետևում է 2․․․Ձxf3+ միջանկյալ քայլը։ Հաջորդ քայլին սևերը ետ կվերցնեն d8-ի թագուհին և կմնան նյութական առավելությամբ։
Այժմ կդիտարկենք մի դեպք, որտեղ միջանկյալ քայլը օգնում է պաշտպանվել հակառակորդի տակտիկական հնարքից և հասնել առավելության։
Տրամագիր 3
Այստեղ սպիտակները 1․Թxe5 քայլով փորձում են օգտագործել սևերի թագուհու՝ կապի տակ գտնվելու փաստը և շահել նավակը, սակայն սևերը 1...dxe5 ակնհայտ քայլի փոխարեն կատարում են 1...Թg4 միջանկյալ քայլը, որով թագուհուն հեռացնում են կապի տակից, միաժամանակ ստեղծելով մատային սպառնալիք g2 դաշտի վրա: Այսպիսով` սպիտակները, մատից խուսափելու համար, ստիպված են վերցնել սևերի ձին, և սևերը ստանում են նյութական առավելություն։
Միջանկյալ քայլերը հնարավոր են ցանկացած դիրքերում: Այսուհետ ուշադիր եղեք և ակնհայտ քայլեր կատարելուց առաջ ստուգեք, արդյո՞ք ավելի լավ միջանկյալ քայլի հնարավորություն չունեք։