Հարձակում h ուղղաձիգով․ 3 բան, որ պետք է հիշել - ChessSchool

Հարձակում h ուղղաձիգով․ 3 բան, որ պետք է հիշել

Հարձակում h ուղղաձիգով․ 3 բան, որ պետք է հիշել

Այսօրվա նյութը վերաբերում է շախմատում հարձակման արվեստին: Զոհաբերությունների բազմաթիվ տարբերակներ կան, որոնցով կարելի է քանդել հակառակորդի փոխատեղումը և արքային թողնել բաց դիրքում: Մեկ այլ հարձակման գաղափար է h ուղղաձիգի օգտագործումը: Այն հիմնականում կիրառվում է խաղացողների հակառակ կողմերի փոխատեղման դեպքում, կամ երբ դուք փոխատեղում չեք կատարել, բայց ձեր արքան վտանգի մեջ չէ, և դուք կարող եք գործողություններ սկսել արքայական թևում: Այդ գաղափարի առավելությունը արագությունն է, քանի որ ձեր նավակն արդեն իսկ h1 դաշտում է, և միակ բանը, որ պետք է անել, ուղղաձիգի բացումն է:

Առաջին հերթին եկե՛ք տեսնենք` ինչպես կարելի է բացել և օգտագործել այս ուղղաձիգը` ձեր շահերից ելնելով:

  1.  Ամենաընդունված գաղափարներից է h4-h5 առաջացումը, որն ուղղված է ֆիանկետտո (փղի թևային զարգացումը՝ g6-Փg7) կառույցի դեմ: Նման դեպքերում սա շատ արդյունավետ է, քանի որ նավակն արագորեն ակտիվանում է` հարձակումն էլ ավելի վտանգավոր դարձնելով:
  2.  h ուղղաձիգը բացելու մեկ այլ միտք է g5 դաշտի թեթև խաղաքարի զոհաբերումը: Ինչպե՞ս անել դա: Ինչպես միշտ, հարձակման համար անհրաժեշտ են ինչքան հնարավոր է շատ խաղաքարեր, և, հետևաբար, ձին կամ փիղը g5 դաշտ տեղափոխելը շատ օգտակար կարող է լինել: Երբ ձեր հակառակորդը փորձում է հետապնդել այն h6-ով, դուք կարող եք խաղալ h4 (!)` թողնելով խաղաքարն այնտեղ` նպատակ ունենալով հետ գրավել ձեր h զինվորով և բացել հզոր h ուղղաձիգը:
  3. Եթե ձեր նավակն այլևս h1 դաշտի վրա չէ, և չեք ցանկանում արքայական թևը թուլացնել h զինվորի առաջխաղացմամբ, միշտ հիշեք,որ նավակին կարելի է ներգրավել հարձակման մեջ 3-րդ շարքից` h3 դաշտում, և մատային սպառնալիք ստեղծել:

Այժմ եկեք տեսնենք, թե ինչպես են գրոսմայստերները կիրառում այս մտքերն իրենց խաղերի ժամանակ: Կսկսենք շատ հմուտ հարձակվող շախմատիստուհի` Յուդիթ Պոլգարի խաղով, ով շատ գեղեցիկ խաղ հաղթեց ֆրանսիական պաշտպանությունում`ուժեղ գրոսմայստեր Ֆերենց Բերկեսի դեմ:

Այս խաղում կտեսնենք, թե ինչպես g5 ձիու զոհաբերության շնորհիվ բացվեց h ուղղաձիգը` հակառակ կողմ փոխատեղված դիրքում: Յուդիթը շատ արագ սկզբնախաղից հետո սկսեց հարձակումն առանց որևէ նախապատրաստման, և, շնորհիվ սևերի պասիվ խաղաքարերի, այն որոշիչ դուրս եկավ:

Այս օրինակը ցույց է տալիս, որ h ուղղաձիգերի վրա հարձակումները հնարավոր են անգամ արքայական թևում փոխատեղման ժամանակ: Խաղը տեղի է ունեցել գրոսմայստեր Լևոն Արոնյանի և ավստրիացի գրոսմայստեր Զոնգ-Յան Զհաուի միջև 2010թ.-ի Շախմատի Օլիմպիադայի ժամանակ: Այն սկսվեց բաց կատալոնական տարբերակով, որտեղ սպիտակներն արագ հսկողություն սահմանեցին կենտրոնում` նավակներին բերելով կենտրոնական ուղղաձիգեր և առաջ մղելով e4-ի զինվորը: Տեսնում ենք, թե ինչպես է Արոնյանը վերախմբավորում իր խաղաքարերը և հզոր հարձակում սկսում h ուղղաձիգի վրա:

Վերջին օրինակում տեսնում ենք, թե ինչպես են սպիտակներն արագ հարձակում սկսում սևերի կարճ փոխատեղման դեմ` խաղալով h4-h5` թողնելով իրենց արքային կենտրոնում: Իմանալով նրա նախապատվությունը սուր, հարձակվող խաղերի վերաբերյալ՝ այնքան էլ զարմանալի չէր, որ գրոսմայստեր Բաադուր Ջոբավան ընտրեց այս ծրագիրը երիտասարդ ամերիկացի գրոսմայստեր Ռեյ Ռոբսոնի դեմ: Տեսեք, թե ինչպես նա իր հակառակորդին կենտրոնում հակագրոհի ոչ մի հնարավորություն չտվեց՝ առաջին հերթին սահմանափակելով նրա խաղաքարերի ակտիվությունը:

Հուսանք, որ վերը ներկայացված գաղափարները կօգնեն ձեզ ավելի լավ հարձակվողական ծրագրեր մշակել և հաջողությամբ կիրառել դրանք:



Նմանատիպ դասեր