Զինվորի փոխարկումը կարող է որոշիչ լինել խաղի ընթացքում, այդ պատճառով խաղացողները պատրաստ են գնալ որոշակի զոհաբերությունների, որոնք կօգնեն նրանց հասնել բաղձալի նպատակին։
Այսօր կուսումնասիրենք նման զոհաբերությունների մի քանի օրինակ։ Բոլոր դիրքերում քայլը սպիտակներինն է։ Փորձեք նախ ինքներդ լուծել, այնուհետև ստուգել պատասխանների հետ։
Տրամագիր 1
Տրամագիր 1-ում թվում է, թե փիղը կարող է կանգնեցնել երկու զինվորներին, և խաղը կավարտվի ոչ-ոքի։ Սակայն սպիտակները հնարամտորեն հասնում են հաղթանակի։
1․ b6! axb6 2. a6! Այստեղ b6-ի զինվորը խանգարում է փղին հսկողության տակ առնել a7 դաշտը, և սպիտակներին հաջողվում է փոխարկել զինվորը թագուհու։
1․․․Փxa5 քայլին սպիտակները հաղթում են 2․ bxa7 քայլով։
Տրամագիր 2
Տրամագիր 2-ում սևերը, կարծես թե, պաշտպանված դիրք ունեն։ Սակայն սպիտակներն օգտվում են սև արքայի հեռու գտնվելու փաստից և զոհաբերության միջոցով հ զինվորը փոխարկում են թագուհու։
1․ Ձxg7! Ձxg7 2. h6 և սևերը ոչ մի կերպ չեն կարող կանգնեցնել հ զինվորի առաջխաղացումը։
Տրամագիր 3
Տրամագիր 3-ում սպիտակները պատրաստ են զոհաբերել անգամ նավակը, միայն թե անցունակ զինվորներից գոնե մեկը փոխարկեն թագուհու։
1․ Նxe7 Նxe7 2. d6 Նe8 3. d7 Նd8 4. e7 Նxd7 5. e8=Թ։
Տրամագիր 4
Տրամագիր 4-ի իրավիճակը նման է առաջին տրամագրին։ Սակայն այստեղ փիղը կարող է փորձել կանգնեցնել զինվորին։
1․g6 hxg6+ 2. Աf6! Այստեղ զինվորին օգնության է հասնում արքան։ 2․․․ Փg8 3. Աg7։
Ավելի հետաքրքիր շարունակություն է 1․․․Փg8 քայլը, որից հետո սպիտակները, հաղթանակի հասնելու համար, պետք է գտնեն ճշգրիտ շարունակությունը։ 2. gxh7-ից հետո խաղը կավարտվի ոչ-ոքի, քանի որ սևերը կփոխանակեն հ զինվորը փղի հետ։ Ճիշտ շարունակությունն է 2․Աf6!։ Արքան կրկին օգնության է հասնում զինվորներին և հաջորդ քայլին ներխուժելով g7՝ սպիտակներին բերում է հաղթած դիրք։
Այս դիրքերը ցույց են տալիս, թե որքան վտանգավոր կարող են լինել անցունակ զինվորները։ Հուսով եմ այս օրինակները կօգնեն, որպեսզի Ձեր դիրքերում էլ գտնեք նման թաքնված զոհաբերություններ, որոնք կնպաստեն անցունակ զինվորների փոխարկմանը։