Այսօր մենք կխոսենք շախմատ պարապելու 14 ամենակարևոր կանոնի մասին, կքննարկենք, թե ինչպես պետք է վերաբերվել շախմատային պարապմունքներին, ինչպես խուսափել պարզ սխալներից և ինչպես չմնալ միջին մակարդակի խաղացող։
Շախմատ պարապելու իդեալական ծրագիր գոյություն չունի։ Իրականում շատ առաջատար շախմատիստներ և մարզիչներ տարաձայնություններ են ունենում միմյանց հետ, թե որոշ բաներ ինչպես պետք է սովորեցնել։ Նրանք նույնիսկ ընդհանուր համաձայնության չեն գալիս որոշ շախմատային դիրքեր գնահատելու հարցում։ Ի՞նչ է դա նշանակում քեզ նման խաղացողի համար, ով ցանկանում է բարելավել իր խաղը։ Դու պետք է շատ սովորես և շատ փորձարկես հասկանալու համար, թե քեզ համար ինչն է գործում և ինչը ոչ։
Ցանկացած տեսակի շախմատային պարապմունքների արդյունավետությունը կախված է նրանից, թե ինչքան ջանք ես ներդնում։ Եթե պարապմունքներն օգուտ չեն տալիս, մեծ հավանականությամբ պատճառն այն է, որ բավարար չես աշխատում։ <<Հաջողությունը կախված է ջանքերից>> (Սոֆոկլես)
Հիանալի է, երբ գիտես, թե ինչպես է պետք շախմատ պարապել և շարունակաբար աշխատում ես այդ ուղղությամբ։ Սակայն մի՛ մոռացիր, որ քրտնաջան աշխատանք է անհրաժեշտ։ Պարապելու տարբեր եղանակներ փնտրելն ու միայն քեզ հարմար բաներ պարապելը քեզ ոչնչի չեն հասցնի։ Կենտրոնացիր այնպիսի բանի վրա, որն իսկապես բարելավման կարիք ունի և դու կզգաս արդյունքը։
Ցանկացած շախմատային պարապմունք քեզ կհոգնեցնի։ Միայն ճիշտ պարապմունքը քեզ ավելի լավ շախմատիստ կդարձնի։
Ուժեղ շախմատիստ դառնալու համար կարիք չկա "թանկարժեք" մարզիչներ վարձելու, յուրահատուկ շախմատային տաղանդ կամ 165 ինտելեկտի գործակից ունենալու։ Այն, ինչ քեզ անհրաժեշտ է, լավ պարապելն ու լավ խաղալն է։
Քեզ համար հաճելի շախմատային երևույթները, որոնց վրա դու ժամանակ ես ծախսում, իրականում հաճելի են, որովհետև հեշտ են։ Եթե հեշտ են, ապա նշանակում է, որ դու արդեն փորձառու ես դրանց մեջ, հետևաբար կարիք չկա դրանց վրա ժամանակ վատնել։ Ավելի լավ է կենտրոնանալ այնպիսի բանի վրա, ինչը բարդ է ու ոչ հաճելի։ Շախմատիստների մեծ մասի համար դա վերջնախաղերն են, դիրքային խաղը և բարդ տակտիկան։
Երբ պարտվում ես, չպետք է տխրես։ Դա քեզ համար պետք է ազդանշան լինի, որպեսզի ավելի լավ աշխատես և վերադառնաս հաղթելու նպատակով։
Մի՛ վախեցիր պարտվելուց, եթե նույնիսկ խաղում ես շատ ավելի ուժեղ հակառակորդի հետ։ Ավելի ուժեղ շախմատիստների գոյությունը ինքնակատարելագործման լավագույն խթանիչն է։
Մի՛ կարծիր, որ ուժեղ շախմատիստ դառնալու համար դու պետք է մի կողմ դնես ամեն ինչ և շախմատի վրա աշխատես օրական 8 ժամ։ Եթե այդպես անես, ապա հավանաբար առաջին շաբաթվանից հետո կհիասթափվես և ուղղակի հրաժեշտ կտաս շախմատին, եթե իհարկե Բոբի Ֆիշերը չես։ Պարապիր շարունակաբար՝ ավելի կարճատև ժամանակահատվածներով։ Ժամանակին համընթաց դու կսկսես առաջխաղացում ունենալ։
Շախմատային պարապմունքների համար գրառումներ անելը նույնպես շատ կարևոր է, ինչը ոչ միայն կօգնի քեզ մոտիվացված ու կենտրոնացած մնալ, այլ նաև կօգնի քեզ հասկանալ, թե ինչն է կիրառելի և ինչը ոչ։
Շախմատում ինքնակատարելագործումը երբեք չի սկսվում բողոքելով ու արդարանալով։ Դու պետք է ինքդ պարտավորություն կրես քո պարտությունների հանդեպ։ Եթե պարտվում ես, ապա պետք չէ մեղադրել <<պատահականությանը>> կամ <<սայթաքումներին>>։ Փնտրի՛ր իրական պատճառը, գործի անցիր, սկսիր հաղթանակներ տանել։
Եթե դու իսկապես նվիրված ես շախմատին, մոտիվացիայի կարիք չունես խաղալու և խաղդ բարելավելու համար։ Այն կգա ներքուստ։
Հանգստացիր կարևոր առաջնությունից առաջ։ Երբեմն հանգստացած օրն ավելի լավ արդյունքներ կբերի։
Շախմատային վերնաշապիկ կամ գլխարկ կրելու փոխարեն շախմատի հանդեպ քո սերը ցույց տուր շախմատի նկատմամբ քո ունեցած նվիրվածությամբ և քո լավ խաղով։
