Նպատակ ունենալն անչափ կարևոր է, եթե ցանկանում ես բարելավել քո շախմատային ուղին։ Քո ցանկացած նպատակ գրի առ թղթի վրա և դիր այնպիսի վայրում, որ կարողանաս ամեն օր տեսնել։ Թղթին հանձնած նպատակը շատ ավելի մեծ մոտիվատոր է, քան մտքում պահածը։ Նպատակդ ընդամենը գրի առնելով՝ կմեծացնես հաջողության հասնելու քո հնարավորությունները։ Եթե ցանկանում ես մի քայլով էլ առաջ գնալ, ապա պետք է նաև գրի առնես, թե ինչու է այդ նպատակը կարևոր քեզ համար և ինչու ես կարծում, որ կկարողանաս հասնել նրան։ Հիշիր, որ դու պետք է սահմանես իրականությանը համապատասխանող նպատակներ և պետք է հավատաս ինքդ քեզ։ Մի՛ մոռացիր, որ առանց վերջնաժամկետի նպատակը երազանք է։ Սահմանիր խիստ վերջնաժամկետներ նպատակներիդ համար, որպեսզի քեզ ռիթմի մեջ պահես։ Օրինակ <<Ես 200 ԷԼՈ միավոր կհավաքեմ 4 ամսից>> միտքը գործող նպատակ է, իսկ <<Ես կդառնամ գրոսմայստեր>> միտքը երազանք է։
<<Կյանքը չունի սահմանափակումներ, բացի այն սահմանափակումներից, որոնք դու ինքդ ես ստեղծում>> - Լես Բրաուն
Նպատակը սահմանելուց հետո պետք է նրան հասնելու տարբերակ գտնես։ Միանգամայն ակնհայտ է, որ ընդամենը օնլայն արագ շախմատ խաղալով դու չես կարողանա վարպետ դառնալ։ Ուստի եթե 1000-2100 վարկանիշ ունեցող շախմատիստ ես և ցանկանում ես 200-300 միավորով վարկանիշդ ավելացնել մոտ ապագայում, ապա պետք է ունենաս պարապելու համար ճշգրիտ պլան։ Ճիշտ կլինի կենտրոնանալ խաղի ամենակարևոր մասերի վրա․
Շախմատիստների մեծ մասը ցանկանում են բարելավել իրենց խաղը, սակայն հաճախ չեն գիտակցում, որ միակ ճանապարհը սովորելն է ու սովորածը իրական պարտիաներում կիրառելը։
Շախմատային ուսուցման մեկ այլ կարևոր կողմը, որ խաղացողները հաճախ մոռանում են, այն է, որ պետք է խաղալ ուժեղ հակառակորդների դեմ։ Նշանակում է՝ եթե ցանկանում ես հասնել 1500-ի, պետք է խաղաս ընդդեմ 1500 վարկանիշ ունեցողների, եթե ցանկանում ես հասնել 2000-ի, պետք է խաղաս ընդդեմ 2000-ների։ Մի՛ կարծիր, որ կարող ես 2000-ի հասնել 1400-1500 վարկանիշ ունեցողներին բազմիցս հաղթելով։
Եկեք պարզաբանենք մի բան․ եթե այժմ քո վարկանիշը 1200 է և ցանկանում ես հասցնել 2000-ի, չի նշանակում, որ պետք է խաղաս ընդդեմ 2000 ունեցողների։ Նախևառաջ պետք է սկսես հաղթել 1400-ներին, հետո՝ 1600-ներին, 1800-ներին և այլն։ Պետք է առաջ շարժվել քայլ առ քայլ՝ խուսափելով բացթողումներից և անել դա սիստեմատիկ ձևով։
Նպատակդ սահմանելուց և սովորելդ պլանավորելուց հետո պետք է բավական ժամանակ ծախսես սեփական պարտիաները վերլուծելու համար։ Առանց քննադատորեն նայելու սեփական հաջողություններին ու ձախողումներին՝ հնարավոր չէ լավ եզրահանգումների գալ և տեսնել, թե ինչի վրա պետք է շատ աշխատես։
Դու պետք է քեզ մոտ ձևավորես քո բոլոր լուրջ պարտիաները վերլուծելու սովորություն։ Շատ շախմատիստներ կասկածամիտ են պարտված պարտիաները վերլուծելու հարցում։ Քո խաղացած պարտիաներն անվճար դասեր են քեզ համար, որոնք ճիշտ կիրառելու դեպքում մեծ հնարավորություն են տալիս արագ առաջխաղացում գրանցելու։ Կարճ ասած, վերլուծիր բոլոր լուրջ պարտիաներդ և մեծ առաջընթաց կունենաս։
Ոչ ոք չեմպիոն չի դարձել՝ հանձնվելով, ոչ ոք հաղթող չի դարձել՝ ընկրկելով։ Միշտ մտքումդ պահիր այս երկուսը, հավատա ինքդ քեզ, հետևիր քո պլանին և կհասնես քո նպատակներին։